మనువిద్యా – పంచకృత్యపరాయణా Manuvidya - Pancha Krutya Paraayana

 

శుక్లాంబరధరమ్ విష్ణుమ్ శశివర్ణమ్ చతుర్భుజమ్|

ప్రసన్న వదనమ్ ధ్యాయేత్ సర్వ విఘ్నోపశాంతయే||

శ్రీగురుభ్యోనమః

 

పఞ్చాశన్నిజదేహజాక్షర భవైర్నానావిధైర్ధాతుభిః

బహ్వర్ధైః పదవాక్యమానజనకైరర్ధాఽవినాభావితైః

సాఽభిప్రాయవదర్ధ కర్మఫలదైః ఖ్యాత్యైరనంతైరిదమ్

విశ్వమ్ వ్యాప్య చిదాత్మనాఽహమహమిత్యుజ్జృంభసే మాతృకే || 

(శక్తి  మహిమ్నస్తోత్రమ్ – 27)

 

 

మనువిద్యా – పంచకృత్యపరాయణా

 

మను అంటే మంత్రము.  మనువిద్యా నుండి పంచకృత్యపరాయణావరకు నామములందు వాగ్దేవతలు అమ్మతల్లి యొక్క పంచదశీమంత్రస్వరూపమును ఆవిష్కరిస్తున్నారు.

 

వాగ్భవ, కామరాజ, శక్తికూటములు/సోమసూర్యాగ్ని మండలములని మూడుమండలములు గల్గినది పంచదశీ మంత్రము.

 

న నుండి త వరకుగల అక్షరములనుండి శ్రోత్రాది జ్ఞానేంద్రియములు, ణ నుండి ట వరకుగల అక్షరములనుండి వాగాది కర్మేంద్రియములు ఞ నుంచి చ వరకుగల అక్షరములనుండి శబ్దాది పంచతన్మాత్రలు, ఙ నుండి క వరకుగల అక్షరములనుండి ఆకాశాది పంచభూతములు ఉత్పనమైనవి. (లక్ష్మీతంత్రము 19.43-44)

 

చంద్రమండలమధ్యగా నుండి వచ్చు ఏడు నామములను వాగ్దేవతలు ఇంద్రియసంబంధిత అక్షరము చ తో ప్రారంభించుటద్వారా చంద్రవిద్యా నుండి చక్రరాజనికేతనా నామములందు సప్తాశ్వములను నిర్దేశించినారు .  ఈ ఏడు నామములు సప్తాశ్వారూఢుడైన సూర్యసంబంధితమైనవిగ సూచించుచున్నట్లున్నది.  కాగా, ఈ ఏడునామములు భానుమండలసంబంధిత కామరాజకూటమును తెలియజేయునవిగనున్నవి.

 

తదుపరి వచ్చు ఐదునామములు అగ్నిసంబంధమైనవని తెలియజేయుటకు జ్ఞానేంద్రియ సంబంధిత అక్షరమైన ప-కారముతో ప్రారంభించి పంచాగ్నులమధ్య తపస్సుజేసిన పార్వతమ్మని (పార్వతి నుండి పంచబ్రహ్మస్వరూపిణి) మొదటినామముగా పెట్టినారు వాగ్దేవతలు. ఈ నామములు అగ్నిమండల సంబంధిత శక్తికూటమును తెలియజేయునవి.

 

చిన్మయీ, పరమానందా, విజ్ఞానఘనరూపిణి – సచ్చిదానందమయ పరమాత్మ

ధ్యాన, ధ్యాతృ, ధ్యేయము – 3 (త్రిపుటి)

జాగృత్ (విశ్వరూపా), స్వప్న (తేజస్సు), సుషుప్తి (ప్రజ్ఞ), తురీయము – 4 (3 అవస్థలు + 1 అవస్థారహిత స్థితి )

సృష్టి (బ్రహ్మరూపము), స్థితి (గోవిందరూపము), సంహారము (రుద్రరూపము), తిరోధానము (ఈశ్వరరూపము), అనుగ్రహము (సదాశివస్వరూపము) – 5 కృత్యములు

 

ప్రతిపత్తునుండి పూర్ణిమవరకుగల తిథులకు అనుబంధముగా చెప్పబడిన ఈ 15నామములద్వారా చంద్రమండల సంబంధిత వాగ్భవకూటమును తెలియజేస్తున్నారు వాగ్దేవతలు.

 

ఈ విధముగా సప్తాశ్వరథారూఢుడైన సూర్యమండల సంకేతముగా ఏడునామములు, పంచాగ్నుల సంబంధిత అగ్నిమండలసంకేతముగా ఐదునామములు, 15తిథుల సంబంధిత చంద్రమండల సంకేతముగా పదిహేను నామములతో స్తుతించుటద్వారా పంచదశీమంత్రముయొక్క మూడుకూటములను ఆవిష్కరిస్తున్నారు వాగ్దేవతలు.

 

మంత్రము, తంత్రము, యంత్రము ఈ స్తోత్రమందు ఒక వరుసగా వస్తున్నాయని చెప్పుకున్నాము. భానుమండలస్థుడైన సూర్యభగవానుడు జీవులందు కర్మప్రేరక దేవతామూర్తి. అందుచే భానుమండలమధ్యస్థా నామమునుండి వామకేశి వరకుగల నామములవరకు కర్మానుష్ఠానసంబంధిత దశమహావిద్యాతంత్రములను వివరిస్తున్నారు వాగ్దేవతలు.

 

పంచదశాక్షరిరూపిణిని  ప్రార్ధిస్తూ

శ్రీమాత్రేనమః